Rhagfyr 2021
‌
Mae pob un ohonom yn Iechyd a Gofal Digidol Cymru
yn dymuno Nadolig heddychlon a Blwyddyn Newydd dda i chi a'ch teulu.
System Imiwneiddio Cymru yn ehangu er mwyn rhoi rhagor o bigiadau atgyfnerthu 
Yn dilyn y cyhoeddiad y bydd pigiadau atgyfnerthu yn cael eu rhoi’n gynt, mae Iechyd a Gofal Digidol Cymru wedi cefnogi byrddau iechyd i greu 1 miliwn o apwyntiadau brechlynnau COVID-19 ychwanegol erbyn diwedd mis Rhagfyr.  
 
Mae System Imiwneiddio Cymru (WIS) - a gynlluniwyd ac a reolir gan Iechyd a Gofal Digidol Cymru — yn darparu apwyntiadau a gynhyrchir gan y system (SGAs) i greu slotiau byr rybudd a sicrhau bod apwyntiadau'n cael eu llenwi mor effeithlon â phosibl.  
 
Adroddir bod nifer yr apwyntiadau a gynhyrchir gan y system y gofynnwyd amdanynt gan fyrddau iechyd wedi treblu’r wythnos hon yn dilyn cyhoeddi’r ymgyrch atgyfnerthu gan Lywodraeth y DU ar 12 Rhagfyr. 
 
Roedd uwchraddiad i WIS y mis diwethaf yn cynnwys tecstio dwy ffordd ar gyfer apwyntiadau brechlynnau, gan ganiatáu i bobl ymateb i wahoddiadau trwy anfon neges destun i ganslo neu aildrefnu apwyntiad. Mae hyn wedi helpu i leihau nifer y bobl sy'n colli apwyntiadau ac mae hefyd wedi lleihau faint o alwadau ffôn ychwanegol a wneir i swyddfeydd archebu’r byrddau iechyd.  
 
WIS yw'r system wybodaeth sy’n amserlennu, gwahodd a chofnodi brechiadau COVID-19 ar gyfer poblogaeth Cymru. Mae'n sicrhau bod unigolion yn cael brechiadau yn y drefn a'r lleoliadau cywir. Mae'n rheoli llythyrau a negeseuon testun sy’n ymwneud â’r apwyntiadau yn ganolog.  
Fferyllwyr cymunedol yn cofnodi dros 160,000 o frechiadau ffliw tymhorol ar Dewis Fferyllfa
Mae'r cymhwysiad Dewis Fferyllfa ar gael mewn 98% o fferyllfeydd cymunedol yng Nghymru i gefnogi fferyllwyr achrededig i ddarparu gwasanaethau clinigol gwell. 
 
Dechreuodd y cymhwysiad drwy gynnig un modiwl ar gyfer Anhwylderau Cyffredin ac mae bellach yn cynnwys chwe gwasanaeth.
 
Mae'r Gwasanaeth Brechu Ffliw Tymhorol yn cefnogi'r ymdrech genedlaethol i frechu rhag y ffliw tymhorol drwy gynnig lleoliad ychwanegol i gleifion gael eu brechiadau ffliw. Mae dros 160,000 o frechiadau ffliw wedi cael eu cofnodi’r tymor hwn, o'u cymharu â 92,500 y llynedd a 64,000 yn ystod 2019/2020.
 
Gyda chaniatâd y claf, gall y fferyllydd gyfeirio at Gofnod Meddyg Teulu Cymru i wirio gwybodaeth am feddyginiaeth neu alergeddau a thrwy hynny wella diogelwch cleifion. Mae meddyg teulu y claf yn derbyn cofnod electronig o'r ymgynghoriad a'r brechlyn a ddefnyddiwyd.
 
Mae llawer o gleifion yn ei chael hi’n gyfleus iawn cael mynediad at wasanaethau clinigol yn eu fferyllfeydd. Mae fferyllfa ar bron bob stryd fawr, mae fferyllfeydd ar agor gyda'r nos ac mae llawer ohonynt yn cynnig apwyntiadau galw i mewn. 
System newydd yr Adran Achosion Brys Digidol yn dechrau cyflwyno cynllun cenedlaethol yng Nghastell-nedd Port Talbot
Uned Mân Anafiadau Castell-nedd Port Talbot yw'r cyntaf yng Nghymru i ddefnyddio system Adran Achosion Brys (A&E) genedlaethol newydd. Bydd y system ddigidol yn cymryd lle cofnodion papur a bydd yn darparu grid olrhain electronig i roi gwybodaeth amser real i weithwyr gofal iechyd proffesiynol am driniaeth claf.
 
Cyn hyn, roedd yr Uned Mân Anafiadau yn defnyddio cofnodion papur i gofnodi gofal cleifion, ond mae'r system newydd yn creu cofnodion digidol y gellir eu rhannu'n ddiogel ac yn gyflym ag adrannau a gweithwyr gofal iechyd proffesiynol eraill.
 
Yn dilyn lansiad llwyddiannus y system yng Nghastell-nedd Port Talbot, bydd yn cael ei rhoi ar waith yn Ysbyty Treforys yn Abertawe yn gynnar yn ystod 2022, a'i chyflwyno yn rhannau eraill o Gymru yn ystod y flwyddyn nesaf.
Desg Wasanaeth Iechyd a Gofal Digidol Cymru wedi cyrraedd y rownd derfynol ar gyfer gwobr a gydnabyddir yn fyd-eang

Mae ein tîm Desg Wasanaeth Iechyd a Gofal Digidol Cymru wedi cyrraedd y tri olaf ar gyfer y categori Desg Wasanaeth Orau (Menter Fawr) yng Ngwobrau'r Sefydliad Desg Wasanaeth (SDI) eleni.
 
Mae'r SDI yn cynrychioli miloedd o gwmnïau a gweithwyr proffesiynol desg wasanaeth mewn dros 150 o wledydd. Mae gwobrau SDI yn canmol timau gwasanaeth a chymorth TG sy'n cyflawni’r lefelau uchaf o ragoriaeth a gwasanaeth i bob cwsmer.
 
Cynhelir Gwobrau SDI 2022 ar 22 Mawrth 2022, yn Hilton Birmingham Metropole.
 
Mae ein Desg Wasanaeth yn gwasanaethu GIG Cymru Gyfan ac yn gweithredu fel pwynt cyswllt sengl rhwng gwasanaethau desg lleol a thimau cymorth cenedlaethol. Mae’n darparu canolbwynt ar gyfer adrodd am ddigwyddiadau a gwneud ceisiadau gwasanaeth.